Сүхбаатар дүүргийн орон нутгийн төсвийн хөрөнгө оруулалтаар 13 дугаар хороонд байгуулсан спорт цогцолбор бүхий цэцэрлэгт хүрээлэнг улсын комисс хүлээн авчээ.
Ингэснээр тус бүтээн байгуулалт ашиглалтад ороход бэлэн болсон байна. Нийт 29.9 мянган ам метр талбайд хэрэгжсэн энэхүү цогцолбор нь олон улсын тэмцээн зохион байгуулах стандартын шаардлагад нийцсэн гурван давхар спортын барилга болон гадна талбайн иж бүрэн тохижилтоос бүрджээ.
Гадна талбайд хөлбөмбөг, газрын теннис, сагсан бөмбөгийн талбай, гүйлтийн болон дасгалын зам, хүүхдийн тоглоомын талбай, амралтын бүс, ногоон байгууламж, усан оргилуур, автомашины зогсоол, гэрэлтүүлэг зэрэг шийдлийг багтаасан байна.
Спорт цогцолборын нэгдүгээр давхарт ширээний теннис, фитнес, боксын заал, хурлын танхим, хувцас солих болон бэлтгэлийн өрөө, хоолны заал, агуулах зэрэг шаардлагатай хэсгүүдийг шийджээ. Харин хоёрдугаар давхарт үндсэн сагсан бөмбөгийн заал, заалны хөлбөмбөг, волейбол зэрэг спортоор хичээллэх олон зориулалтын заал болон хананд авиралтын хэсгийг байгуулсан байна. Гуравдугаар давхарт үзэгчдийн суудал, камер болон шүүгчийн өрөө, ашиглалтад зориулагдсан дээврийн талбайг тохижуулжээ.
Тус спорт цогцолбор ашиглалтад орсноор Сүхбаатар дүүргийн 140 гаруй мянган иргэн спортоор хичээллэх, чөлөөт цагаа зөв боловсон өнгөрүүлэх, эрүүл амьдралын хэв маягийг хэвшүүлэх боломж бүрдэх юм. Мөн биеийн тамир, хүүхдийн тоглоомын талбай, амралтын бүс, авто болон дугуйн зам, автомашины зогсоол, ногоон байгууламжийг нэг дор шийдсэнээрээ онцлог бүтээн байгуулалт болж байна.
Сэтгэгдэл (0)
Сэтгэгдэл бичигдээгүй байна