“Алтан бөмбөг” шагналыг 2018 онд хүртэж байсан Хорватын хагас хамгаалагч Лука Модрич Италийн “Милан” клубтэй байгуулсан гэрээгээ сунгажээ. Өдгөө 40 настай тэрбээр тус клубт 2027 оны 6 дугаар сарын 30 хүртэл тоглохоор болсон байна.
“Россонери-гийн хагас хамгаалалт дахь гол хүн болох Лука манай клубт ирсэн цагаасаа хойш өөрийн туршлага, ур чадварыг багтаа өвлүүлж, үүний зэрэгцээ даруу зан, асар их хүсэл тэмүүллээрээ ялгарч байлаа. "Россонери" футболкийг өмссөн дэлхийн хөл бөмбөгийн шилдэг тоглогч тэрбээр өнгөрсөн улиралд 37 тоглолтод оролцохдоо 2 гоол оруулж, шинэ оргилд гарах хүсэл эрмэлзлээ дахин харууллаа” гэж “Милан” клубийн мэдээлэлд дурджээ. Россонери гэдэг нь АС Милан багийн албан бус хоч нэр юм. Итали хэлний rosso (улаан), neri (хар) гэсэн үгсээс гаралтай энэ үг тус багийн өмсгөлийн улаан, хар судалтай өнгийг бэлгэддэг.
Лука Модрич 2025 оны зун чөлөөт агентын хувиар “Милан” клубт шилжин ирсэн юм. Өмнө нь тэрбээр Хорватын Загреб хотын “Динамо” баг, Запрешич хотын “Интер” баг, Боснийн “Зриньски” баг, Английн “Тоттенхэм”, Испанийн “Реал” багт тоглож байв. Ингэхдээ “Реал”-ын бүрэлдэхүүнд Испанийн аваргаар 4 удаа шалгарч, Испанийн цомыг хоёр удаа, Супер цомыг 5 удаа хүртэж, Аваргуудын лигт 6 удаа түрүүлж, УЕФА-гийн Супер цомыг 5 удаа өргөж, клубүүдийн ДАШТ-д 5 удаа аваргалснаас гадна Тив хоорондын цомыг хүртсэн юм.
Өнгөрсөн улиралд “Милан” баг Италийн ДАШТ-д 5 дугаар байр эзэлсэн тул Аваргуудын лигийн тэмцээнд оролцох боломжгүй болсон бөгөөд ирэх улиралд Европын лигт хүч үзнэ.
Сэтгэгдэл (0)
Сэтгэгдэл бичигдээгүй байна