ДУНДГОВЬ: Улаанбаатар–Мандалговь чиглэлийн автозамын их засвар ирэх сард дуусна

Улсын төсвийн хөрөнгө оруулалтаар хэрэгжүүлж буй Улаанбаатар Мандалговь чиглэлийн автозамын 28 километр хэсгийн засварын ажлыг ирэх наймдугаар сард дуусгахаар төлөвлөж байна.

Төслийн эхний ээлжийн 12.6 километр замын засварын ажлыг өнгөрсөн хоёрдугаар сараас "Тэгш плант" ХХК гүйцэтгэж эхэлжээ.

Одоогоор замын даланг өргөтгөх, хуучин асфальт бетон хучилтыг дахин боловсруулах, цементээр бэхжүүлсэн суурь байгуулах, суурь асфальт бетон хучилт хийх ажлыг үе шаттайгаар үргэлжлүүлж байна. Ажлын явцаас дурдбал, хуучин асфальт хучилтыг 8 километр, цементээр бэхжүүлсэн суурийг 5 километр, суурь асфальтбетон хучилтыг 1.5 километр урт хэсэгт хийгээд байна. Гүйцэтгэгч байгууллагууд нийт засварын ажлыг ирэх наймдугаар сард бүрэн дуусгахаар ажиллаж байна.

Улаанбаатар – Мандалговь чиглэлийн авто зам нь нийслэлийг Дундговь, Өмнөговь аймаг болон говийн бүсийн уул уурхай, бүтээн байгуулалт, тээвэр логистикийн гол зангилаатай холбодог стратегийн ач холбогдолтой зам юм.

Сүүлийн жилүүдэд хөдөлгөөний эрчим нэмэгдэж, замын зарим хэсэгт эвдрэл үүссэнтэй холбоотойгоор үе шаттай засвар, шинэчлэлийг хийж байгаа бөгөөд энэ удаагийн ажил дууссанаар зорчих нөхцөл сайжирч, замын хөдөлгөөний аюулгүй байдал нэмэгдэнэ.

Засварын хугацаанд тухайн хэсгийн хөдөлгөөнийг түр замаар зохицуулж байгаа тул жолооч, зорчигчдыг замын тэмдэг, тэмдэглэгээг чанд мөрдөж, анхаарал болгоомжтой зорчихыг Дундговь аймгийн Замын цагдаагийн газраас зөвлөж байна.