Сүхбаатар дүүргийн Эрүүл мэндийн төвийн харьяа “Эрүүл мэндийг дэмжих төв” өнөөдөр үүдээ нээж, нийслэлийн төвийн бүсийн иргэдэд урьдчилан сэргийлэх болон амбулаторийн цогц тусламж, үйлчилгээг нэг дор үзүүлж эхэллээ.
Тус төвийг улсын төсвийн 4.3 тэрбум төгрөгийн барилга, 1 тэрбум төгрөгийн эмнэлгийн тоног төхөөрөмжийн хөрөнгө оруулалтаар байгуулсан бөгөөд 2,119.5 м.кв талбай бүхий таван давхар орчин үеийн барилга юм. Ингэснээр 1957 онд ашиглалтад орсон 963 м.кв талбайтай хуучин барилгыг бүрэн шинэчилж, хүчин чадлыг хоёр дахин нэмэгдүүлжээ.
Шинэ төв нь хиймэл оюун ухаанд суурилсан орчин үеийн тоног төхөөрөмжөөр тоноглогдсон бөгөөд Сүхбаатар дүүргийн 1–5 дугаар хороо болон нийслэлийн төвийн бүсийн 30 мянга гаруй иргэнд эрүүл мэндийн үйлчилгээ үзүүлэх боломжтой болж байна.
Төвд 17 төрөлжсөн мэргэшлийн эмчийн амбулаторийн үзлэг, 15 төрлийн оношилгоо, лабораторийн шинжилгээ, ходоодны дуран, хөхний маммографийн шинжилгээ, сэргээн засах эмчилгээ, сэтгэлзүйн зөвлөгөө зэрэг үйлчилгээг нэг дор авах боломж бүрджээ. Мөн Эрүүл мэндийн даатгалд хамрагдсан иргэдэд урьдчилан сэргийлэх 10 төрлийн багц шинжилгээ хийх юм.
Нээлтийн үеэр Монгол Улсын Ерөнхий сайд Н.Учрал хэлэхдээ, хоёр жилийн өмнө тус төвийн шинэ барилгын санхүүжилтийг шийдвэрлэхээр ажиллаж байсан бол өнөөдөр бодит үр дүнд хүрч, иргэд урьдчилан сэргийлэх үзлэг, эрт илрүүлэг, сэргээн засах, сэтгэлзүйн болон эрүүл мэндийг дэмжих цогц үйлчилгээг нэг дор авах боломж бүрдсэнийг онцоллоо.
Ийнхүү “Эрүүл мэндийг дэмжих төв” ашиглалтад орсноор урьдчилан сэргийлэх тусламж үйлчилгээг өргөжүүлж, өвчнийг эрт илрүүлэх, иргэдэд үзүүлэх эрүүл мэндийн үйлчилгээний хүртээмж, чанарыг шинэ шатанд гаргах чухал хөрөнгө оруулалт болж байна.
Сэтгэгдэл (0)
Сэтгэгдэл бичигдээгүй байна