Аваргуудын лигийн тэмцээний шөвгийн наймын эхний тоглолтын шүүлт хангалтгүй түвшинд явагдсантай холбогдуулан “Барселона” багийн зүгээс Европын хөл бөмбөгийн холбоонд /УЕФА/ гомдол гаргажээ.
Уржигдар болсон тоглолтод Мадридын “Атлетико” баг “Барселона”-г 2:0 харьцаагаар талбайд нь буюу “Камп Ноу” цэнгэлдэх хүрээлэнд хожсон билээ. Тоглолтын хоёрдугаар үед “Атлетико”-гийн хамгаалагч Марк Пубиль гараараа бөмбөгт хүрсэн атал шүүгч 11 м-ийн торгуулийн цохилт заагаагүй явдалд Каталоны клубийн удирдлага сэтгэл дундуур байгаагаа илэрхийлсэн байна. Шүүгчийн энэ шийдвэр нь тоглолтын явц ба эцсийн дүнд шууд сөргөөр нөлөөлсөн гэж “Барселона” үзжээ. Үүнтэй холбогдуулан тусгай шалгалт явуулж, шүүгч нарын яриаг сонсох боломжийг олгох, алдаагаа хүлээн зөвшөөрч, зохих арга хэмжээ авахыг шаардсан байна.
Энэ бол сүүлийн үед Аваргуудын лигийн тэмцээний үеэр гарсан анхны алдаа биш бөгөөд шүүгч нарын иймэрхүү ойлгомжгүй шийдвэрүүд нь тухайн багт ноцтой хохирол учруулж байгааг “Барселона” дурдсан байна.
Шөвгийн наймын хариу тоглолт 14-ний өдөр Мадридад болно.
Энэ улиралд тус хоёр баг таван удаа учраа тааран тоглосон бөгөөд Испанийн цомын тэмцээний хагас шигшээд каталончууд хоёр тоглолтын нийлбэрээр /0:4, 3:0/ хожигдсон бол Испанийн аварга шалгаруулах тэмцээнд хоёр удаа /3:1, 2:1/ “Атлетико”-г хожоод байна.
“Барселона” баг Аваргуудын лигт 1992, 2006, 2009, 2011, 2015 онуудад нийт таван түрүүлээд байгаа юм.
Сэтгэгдэл (0)
Сэтгэгдэл бичигдээгүй байна