УИХ-ын даргыг сонгох асуудлаар АН-ын бүлэгт нэг хоногийн завсарлага өгөв

УИХ-ын чуулганы өнөөдрийн нэгдсэн хуралдаанаар УИХ-ын даргыг сонгох тухай асуудлыг авч хэлэлцлээ.

УИХ дахь МАН-ын бүлгийн дарга Ж.Батжаргал хэлэлцүүлгийн эхэнд хийсэн танилцуулгадаа, тус бүлгийн өнөөдрийн хуралдаанаас УИХ-ын даргад УИХ-ын гишүүн С.Бямбацогтыг нэр дэвшүүлж буйг бүлгийн гишүүдийн олонх дэмжсэн болохыг хэлж, нэр дэвшигчийн намтрыг уншиж танилцуулсан юм.

Үүний дараа УИХ дахь АН-ын бүлгийн дарга О.Цогтгэрэл хэлэлцэж буй асуудлаар гурав хоногийн завсарлага хүссэн. Тэрбээр завсарлага авч буй шалтгааныг тайлбарлахдаа УИХ-ын гишүүн С.Бямбацогтыг УИХ-ын даргад нэр дэвшүүлж байгаад татгалзах зүйлгүй. Харин таван намын төлөөлөл бүхий парламент ажиллаж байхад ямар нэг асуулт хариултгүй шууд санал хураалт явуулж байгааг дэмжихгүй байгаагаа илэрхийлээд, хэлэлцэж буй асуудлаар хууль, эрх зүйн хувьд тодотгох шаардлагатай гэлээ.

УИХ-ын дэд дарга Ж.Бат-Эрдэнэ эл асуудлаар тус бүлэгт нэг хоногийн завсарлагын хугацаа өгөв.