Финландын хоккейчид 5 дахь удаагаа Олимпын хүрэл медаль хүртлээ

Өвлийн Олимпын хоккейн тэмцээний хүрэл медалийн төлөөх тоглолтод Финландын хоккейчид Словакийн багийг 6:1-ээр илт давамгайлан хожлоо. 

Финландчуудаас Себастьян Ахо (8 дахь минут), Эрик Хаула (29, 59), Роопе Хинтц (49), Каапо Какко (50), Йоэль Армиа (56) нар гоол оруулсан бол Словакийн багаас Томаш Татар (40) хариу гоол хийжээ. 

Ийнхүү Финландын хоккейчид 5 дахь удаагаа Олимпын хүрэл медалийг хүртлээ. Тэд өмнө нь 1994, 1998, 2010, 2014онуудад III байр эзэлж байжээ. Мөн 2022 онд Финландын шигшээ баг анх удаагаа өвлийн Олимпын аварга болж, 1988, 2006 онуудад мөнгөн медаль хүртэж байв. 

Харин Словакийн хоккейчид 2022 оны Бээжингийн Олимпоос хүрэл медаль хүртсэн нь хамгийн өндөр амжилт юм. 

Хүрэл медалийн төлөө Словакийн багийн бүрэлдэхүүнд Ярославлийн “Локомотив” багийн Мартин Гернат, Череповецийн “Северсталь”-ийн Адам Лишка, Москвагийн “Спартак” багийн довтлогч Адам Ружичка нар тоглолоо.  

Өнөөдөр буюу өвлийн Олимпын сүүлчийн өдөр алтан медалийн төлөөх Канад, АНУ-ын багуудын тоглолт 21.10 цагт /УБ-ын цагаар/ эхэлнэ.

Одоогийн байдлаар Олимпын медалийн хүснэгтийг Норвегийн шигшээ баг 18 алт, 11 мөнгө, 11 хүрэл медальтайгаар тэргүүлж байгаа бол АНУ-ын тамирчид /11-12-9/, Нидерландын шигшээ баг /10-7-3/ удаалж байна.  Нийт 30 улсын тамирчид медаль хүртжээ.