“Насны хишиг”-т шинээр хамрагдах ахмадуудын хүсэлтийг авч эхэлжээ

Улсын хэмжээнд “Насны хишиг” мөнгөн тусламжийг ахмадуудад наадам болон сар шинийн баярын өмнө жилд хоёр удаа олгодог.

Энэ онд 65 нас хүрч буй “Насны хишиг” хөтөлбөрт хамрагдах ахмадуудын хүсэлтийг хүлээн авч эхэлжээ. Ахмад настнуудад наснаас нь хамааран 50000-250000 төгрөг олгодог журамтай. Тухайлбал, 65-69 настайд 50000, 70-79 настайд 80000, 80-89 настайд 150000, 90 ба түүнээс дээш настайд 250000 төгрөг өгөх юм. 2025 оны байдлаар Монгол Улсад 65-аас дээш насны 190 гмянга гаруй ахмад настан байгаа гэх судалгаа бий.

“Насны хишиг” тэтгэмжийг 2017 оны нэгдүгээр сарын 1-нээс олгож эхэлсэн бөгөөд тус тэтгэмжид анх удаа хамрагдах гэж байгаа болон өмнө нь хамрагдаж байгаагүй иргэд E-Mongolia системээр дамжуулан хүсэлтээ цахимаар илгээх ажээ. Анх удаа авах иргэд хүсэлт илгээхдээ юуны түрүүнд өөрийн бүртгэлээрээ E-Mongolia систем рүү нэвтэрч, “Насны хишиг” үйлчилгээг сонгож, бүрдүүлэх баримт бичгийн жагсаалтыг цахимаар илгээх юм. Улмаар үргэлжлүүлэх хэсэгт дарж, дансны мэдээлэл хэсэгт өөрийн ашигладаг арилжааны банкаа сонгон, өөрийн нэр дээрх дансны дугаараа оруулан бүртгүүлэн баталгаажуулах юм байна. Харин өмнө нь “Насны хишиг” авч байсан ахмадуудын мэдээллийг автоматаар сунгадаг тул дахин шинээр хүсэлт илгээх шаардлагагүй.

Биечлэн очих тохиолдолд өөрийн оршин суугаа харьяа дүүрэг, сумын халамжийн мэргэжилтэнд иргэний үнэмлэхтэйгээ очиж бүртгүүлнэ. Өөрийн биеэр очих боломжгүй бол итгэмжлэгдсэн төлөөлөгчөөрөө дамжуулан хүсэлтээ илэрхийлснээр тухайн итгэмжлэгдсэн төлөөлөгч нь ахмад настны иргэний үнэмлэх бусад баримт бичгийг хавсарган “Насны хишиг” авах өргөдлийн маягтыг бөглөж бүртгүүлэх юм. “Насны хишиг”-ийн мөнгийг ирэх сард олгоно.