26 настай эмэгтэй Квон, хагалгаа хийсэн 61 настай эмч Шим, мөн 81 настай эмнэлгийн захирал Юн нарыг аллага гэсэн зүйл ангиар буруутгаж байна. Прокурорууд эмнэлгийн захиралд 10 жилийн хорих ял, 5 сая воны торгууль болон 1.15 тэрбум воныг хураах, харин Квон болон эмч Шим нарт тус бүр 6 жилийн хорих ял оноохыг хүсжээ.
Энэ хэрэг Квон 2024 онд YouTube-д өөрийн туршлагыг нийтэлснээр олон нийтэд ил болж, мөрдөн шалгалтаар түүнийг 34–36 долоо хоногт кесар хагалгаа хийлгэсэн нь тогтоогдсон байна. Тэрээр жирэмслэлтээ орой мэдсэн, хүүхэд өсгөх боломжгүйгээс айсан гэж тайлбарлаж, ял багасгахыг хүссэн байна.
Прокуроруудын мэдээлснээр ураг төрсний дараа даавуунд боож хөргөгчинд хийснээр нас барсан бөгөөд эмнэлэг үүнийг амьгүй төрөлт гэж хуурамчаар бүртгэсэн гэж үзжээ. Мөн захирал Юн зуучлагчаар дамжуулан 527 хүнд ийм төрлийн хагалгаа хийж, нийт 1.4 тэрбум вон авсан байж болзошгүй гэжээ.
Одоогийн хуулиар жирэмсний 24 долоо хоногоос хойш үр хөндөлт хууль бус ч, хуульд өөрчлөлт ороогүйгээс ял шийтгэлийн тодорхой заалтгүй хэвээр байна 
. Прокурорууд энэ хууль эрх зүйн цоорхойг ашигласан ноцтой хэрэг гэж үзэж, кесар хагалгааг төрөлт эхэлсэн мөч хэмээн тайлбарласан бол өмгөөлөгчид аллагын бүрэлдэхүүнд хамаарахгүй гэж маргав.
Шүүхийн анхан шатны шийдвэрийг 3-р сарын 4-нд гаргана
Сэтгэгдэл (0)
Сэтгэгдэл бичигдээгүй байна