Автомашины олимп хэмээн нэрлэдэг 48 дахь удаагийн “Дакар ралли” уралдаан өндөрлөлөө.
14 хоногийн турш авто, мото спорт сонирхогчдын анхаарлыг татсан энэ уралдааны мотоциклийн төрөлд 120 гаруй тамирчин уралдав. Манай улсаас Монгол Улсын гавьяат тамирчин Э.Халиунболд, олон улсын хэмжээний мастер П.Мөрөн нар оролцож, алтан соёмбот төрийн далбаагаа мандуулж, эх орныхоо нэрийг дуурсгалаа. Сүүлийн буюу хаалтын 13 дахь гараанд “Тал нутгаас Дакарт” төслийн тамирчин Э.Халиунболд 13 гарааны дараах нийлбэр дүнгээр шилдэг 20, Ралли-2 ангилалдаа 10-т багтав. Тодруулбал, нийт тамирчдаас 16, Ралли-2 ангилалд зургаадугаар байр эзэлжээ. Түүнчлэн шилдэг шинэ тамирчны гуравдугаар байрын цомын эзэн боллоо. Энэ бол монгол хүний Дакарт бичсэн түүх юм. Ингэснээр Монголоос “Дакар ралли”-д оролцсон тамирчдаас цом хүртсэн анхны тамирчин болов. Тэрбээр уралдаанаа дуусгасны дараа “Дакарт уралдахад төсөөлөл анх байгаагүй ч үүнийг хийх ёстой л гэж бодсон. Гэхдээ дотроо нууцхан шилдэг 20-д багтах юмсан гэх хүсэлтэй. Тэгээд “Дакар ралли”-д оролцсоноор 16-д багтаж, зарим гараанд дээгүүр уралдаж, зураг унших сургалтад сууж номын дуу сонссондоо баяртай байна. Бидний төслийг анхнаас дэмжиж байсан бүх хүнд баярлалаа. Энэ хүртэл авч явсан “Тал нутгаас Дакарт” төслийн багийнхаа хамт олонд талархал илэрхийлье” хэмээн ярилаа.
Харин олон улсын хэмжээний мастер П.Мөрөн ерөнхий дүнгээр 29, Ралли-2 ангилалдаа 19 дүгээр байрт шалгарсан амжилтаар 48 дахь удаагийн “Дакар ралли”-г өндөрлүүллээ. Тэрбээр “Адармаатай төгсгөл байлаа. Энэ хүртэл намайг дэмжсэн бүх хүнд баярлалаа. Ямартай ч 13 гараагаа дуусгаж, шилдэг 30-д багтсандаа баяртай байна” гэв.
Энэхүү уралдаанд амжилттай оролцсон Монголын баг тамирчид энэ сарын 20-ны өглөө эх орондоо газардана.
Сэтгэгдэл (0)
Сэтгэгдэл бичигдээгүй байна