“MongolZ” багийн залуус Мэйжорын плей-оффт тоглоно

Унгарын нийслэл Будапешт хотноо цахим спортын “CS2” төрлийн энэ оны сүүлийн Мэйжор тэмцээн үргэлжилж байна.

Энэхүү тэмцээний гуравдугаар шатны сүүлийн тоглолтууд өндөрлөж, плей-оффт өрсөлдөх найман багийн нэр тодорчээ. Ази, Номхон далайн бүс нутгийн цор ганц төлөөлөл болж үлдсэн Монголын “MongolZ” баг гуравдугаар шатнаас Мэйжорыг эхлүүлж, 3-1 гэсэн амжилттай плей-оффруу шалгарсан. Тэд Мэйжорын эхний тоглолтдоо Бразилын “Imperial” багт хожигдсон ч Нидерландад төвтэй “Liquid”, АНУ-ын “FaZe”, Германы “G2” багийг дараалан хожсоноор сүүлийн шатанд үлдэв.

“MongolZ”-ын плей-оффын өрсөлдөгч нь Остин Мэйжорын аварга Францын “Vitality” баг. Хоёр багийн тоглолт арванхоёрдугаар сарын 12-ны 03:00 цагт эхэлнэ. Хоёр баг Остин Мэйжорын финалд учраа таарахад “Vitality” баг 2:1-ээр хожиж байв. Түүнээс хойш гурван удаа учраа таарахад “The MongolZ” сүүлийн хоёр тоглолтод нь хожжээ.