П.Наранбаяр: 141 дүгээр сургуулийн дэргэдэх барилгыг түрээслэхээр судалж байна

Баянгол дүүргийн 26 дугаар хороонд байрлах 141 дүгээр сургууль 5000 гаруй хүүхэдтэй, гурван ээлжээр хичээллэх ачаалал өндөртэй сургууль юм.

Энэ хүрээнд ачааллыг бууруулах зорилгоор тус сургуулийн дэргэдэх CU сүлжээ дэлгүүртэй барилгыг нэмж түрээслэхээр судалж байна хэмээн Боловсролын сайд мэдээллээ.

Тэрбээр "141 дүгээр сургуульд энэ хичээлийн жилд зөвхөн нэгдүгээр ангид гэхэд 630 хүүхэд шинээр элсэн орж буй. Баянгол дүүргийн 26 дугаар хороо нь 20 гаруй мянган оршин суугчтай.

Иймд барилга нэмж түрээслэх шаардлага, хэрэгцээ байна. Төр түрээслэх боломжийг судалж байна. Түрээслэгч талаас төрд барилгаа түрээслэхийг дэмжиж байгаа. 

Ингэснээр таван ангид 10 бүлэг хичээллэж, 141 дүгээр сургуулийн ачааллыг бууруулан хоёр ээлж рүү оруулах боломжтой болно" гэв. 

Түүнчлэн нийслэлд 36 сургуулийн 19,814 сурагч гурван ээлжээр хичээллэх эрсдэлтэй байсныг түрээслэх гэх мэт хариу арга хэмжээ авсны дүнд гурван сургууль болгоод байгаа аж.