52-ын даваан дээр хүн мөргөж, хөнөөгөөд зугтаасан жолоочийг илрүүлжээ

Орон нутгийн замд эмэгтэй хүнийг мөргөж, амь насыг нь хохироогоод ослын газраас зугтаасан жолоочийг илрүүлжээ.

Хэргийг тодруулбал, Цагдаагийн байгууллагын 102 тусгай дугаарын утсанд сарын 08-ны өдрийн 23:00 цагийн үед Төв аймгийн Баянчандмань сумын 52-ын даваа гэх газарт авто замын хажууд эмэгтэй хүн нас барсан байна гэх дуудлага мэдээлэл бүртгэгджээ.

Мэдээллийн дагуу Тээврийн цагдаагийн албаны шуурхай удирдлагын бүрэлдэхүүн болон шалгалтын ажиллагааг хийхэд 32 настай эмэгтэй тээврийн хэрэгсэлд дайруулж амь хохирсон байх бөгөөд хяналтын камергүй, осолд холбогдсон тээврийн хэрэгсэл хэргийн газраас зугтаасан болох нь тогтоогдсон байна.

Хэргийн газрын үзлэгээр хураан авсан эд зүйлсийг үндэслэн Төв аймгийн Цагдаагийн газар Тээврийн цагдаагийн албаны Эрүүгийн цагдаагийн хэлтсийн алба хаагчид хамтран мэргэжлийн ур чадвар гарган ажиллаж, осол гарган хэргийн газраас зугтаасан тээврийн хэрэгсэл, жолоочийг олж тогтоон холбогдох шалгалтын ажиллагааг үргэлжлүүлэн хийж байна. Сэжигтэн 42 настай эрэгтэй ажээ. 

Жолооч та бүрэн замын хөдөлгөөнд оролцохдоо өөрийн болон бусдын аюулгүй байдлыг хангаж замын хөдөлгөөний дүрмийг чанд сахин биелүүлж байхыг анхааруулж байна.