Франц улсаас иргэн Г.Ган-Очирыг эрэн сурвалжлах ажиллагаа эхлүүлжээ

“Иргэн Г.Ган-Очир” гэх нэрээр нийгмийн сүлжээнд танигдсан этгээдийг Монгол Улсаар зогсохгүй Франц Улсаас Интерполоор эрэн сурвалжлах ажиллагааг эхлүүлжээ.

Г.Ган-Очир нь Монгол Улсад байхдаа бусдын гэрийг галдан шатаасан хэрэгт холбогдон, шалгагдаж байсан. Энэ үедээ буюу 2022 оны долоодугаар сарын 20-ны өдөр гадаад улс руу оргон зугтсан байдаг. Түүгээр зогсохгүй худал мэдээлэл тарааж, бусдыг шантаажилсан хэргээр шалгагдаж байсныг эх сурвалжууд мэдэгдэж байв.

Тэгвэл эрэн сурвалжлагдаж байгаа Г.Ган-Очир гадаад улсад очсон ч түүний хууль зөрчсөн үйлдэл үргэлжилсээр байгаа ажээ. Тухайлбал, гэр бүлийн хүчирхийлэл үйлдсэн хэргээр түүнд Францын Улсын Аннэси хотын Засан хүмүүжүүлэх шүүхийн шүүгч NIEL Christophe, DE MONTGOLFIER Valentine, COVILI Elise нар 2022 оны арванхоёрдугаар сарын 28-нд хоёр жилийн хорих ял ногдуулж байжээ.

Уг шүүхийн шийдвэрийн дагуу Г.Ган-Очир нь Францын Улсын Rumilly, Douvaine, VeigyFoncenex хотуудад амьдарч байхдаа буюу 2022 оны наймдугаар сарын 28-наас 2022 оны арванхоёрдугаар сарын 26-ны өдрийн хооронд Гэр бүл, хамтран амьдрагч буюу иргэний хуулиар хамтран амьдрах гэрээтэй байсан этгээдийн эсрэг тогтмол хүчирхийлэл үйлдсэн, мөн өөрийн асран хамгаалалтад байсан хүүхдүүдийн эсрэг хүчирхийлэл үйлдсэн хэргээр ял оногдуулж, эхнэр, хүүхдүүдтэйгээ нэг гэрт амьдрах, холбоо харилцаанд орохыг хориглож байсан.

Энэ мэтээр гэр бүлийн хүчирхийлэл үйлдэж, хоёр жилийн ял авчихаад, “Франц улс намайг Монгол Улсын Засгийн газрын хүсэлтийн дагуу улс төрийн шалтгаанаар хорьсон” гэж иргэдэд худал мэдээлэл тараасаар байдаг. Хорих ял эдлэх хугацаандаа шоронд өлсгөлөн зарласан, шүүхийн хяналтад гадуур байх үедээ тус улсын нутаг дэвсгэрээс гарч, дахин оргон зугтсан гээд түүний өдүүлсэн асуудал цувардаг.

Тийм ч учраас Францын талаас түүнийг Интерполоор эрэн сурвалжлах ажиллагааг эхлүүлсэн бөгөөд Европын холбооны улсуудаар орогнож байгаа гэх мэдээллийг эх сурвалжууд өгч байна.