Шинээр томилогдсон Ерөнхий сайдад Ардчилсан намаас тавьж буй бодлогын шаардлагын талаар бүлгийн дэд дарга Б.Жаргалан танилцууллаа.
Тэрбээр "Шинэ Ерөнхий сайд УИХ-ын чуулганд баасан гаргийн өглөө Засгийн газрын бүтцээ танилцуулах амлалт өгсөн. Өнөөдөр буюу даваа гаргаас төсвийн тодотгол оруулж ирнэ гэж ярьсан ч одоогоор МАН-ын намын бүлэг хуралдаагүй, Ерөнхий сайд Засгийн газрын бүтцээ өргөн мэдүүлээгүй байна.
Ерөнхий сайд цаг алдалгүй бүтэц бүрэлдэхүүнээ УИХ-д өргөн мэдүүлж, бодлогын тодорхой асуудлууд дээр шийдвэрээ яаралтай гаргаж ажиллах шаардлагатай байна гэж УИХ дахь АН-ын бүлэг үзэж байна. Энэ хүрээнд
- Авилгын асуудлыг шийдэх хүрээнд эхний ээлжид яам, сайд нарын тоог 50, төрийн захиргааны болон тусгай албан хаагчдын тоог 20 бууруулах. Төрийн албаны мэргэшсэн тогтвортой байх нөхцөлийг хадгалж, ашиг сонирхолын зөрчлийг таслан зогсоох,
- Төрийн өмчит аж ахуйн нэгжүүдийг олон нийтийн нээлттэй хувьцаат компани болгох. Орон тоог хоёр дахин бууруулж, үр өгөөжийг эрс нэмэгдүүлэх,
- Төрийн хэмнэлтийг хэрэгжүүлэх замаар төрийн хүнд суртал, татварын байгууллагаас бизнес эрхлэгчдээ чөлөөлж, хувийн өмч, хөрөнгө оруулагчдын эрх ашгийг хамгаалах, хувийн хэвшилд ногдох татварын дарамтыг 20 хувиар бууруулах, энэ онд 20 мянган ажлын байр шинээр бий болгох,
- 2025 оны улсын нэгдсэн төсвийг тодотгож, төсвийн урсгал зардлыг 20 хувиар танах, төсвийн худалдан авалт, хөрөнгө оруулалтын бодлогоор үндэсний аж ахуйн нэгжүүдийг дэмжих буюу тендерийг зөвхөн үндэсний компаниудын дунд зарлах, мега гэгдэх төслүүдийг эдийн засгийн үр өгөөжийн хувьд эрэмбэлэн, үр ашиггүй төслүүдийг хасах,
- ДЦС-3-т гарсан ослын улмаас 2025-2026 оны өвөл дулаан хангамжаар дутах эрсдэлээс сэргийлж, салбарын реформыг бодитоор хэрэгжүүлэх замаар эрчим хүчний хараат байдлыг бүрэн халах зэрэг шаардлагыг тавьж байгаа аж.
Сэтгэгдэл (0)
Сэтгэгдэл бичигдээгүй байна