Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг эрчимжүүлэх ажлын хүрээнд Ерөнхийлөгчийн Тамгын газрын дарга Г.Занданшатар тэргүүтэй төлөөлөгчид “Эрдэнэс Монгол” нэгдлийн удирдлагуудтай албан уулзалт зохион байгууллаа.
Уулзалтын эхэнд, “Эрдэнэс Монгол” ХХК-ийн гүйцэтгэх захирал С.Наранцогт нэгдлийн өнгөрсөн хугацаанд хэрэгжүүлсэн өөрчлөлт, шинэчлэлийн үр дүн, Үндэсний баялгийн санг бүрдүүлэх үүрэг оролцоо, “Тэрбум мод” үндэсний хөдөлгөөн болон шинэ Хархорум хотод мод тарих төлөвлөгөөг танилцуулав. Тэрбээр “Нэгдлийн дунд хугацааны стратеги төлөвлөгөөний үндсэн гурван тулгуур зарчмын нэг нь Тогтвортой хөгжлийн орилтуудыг хангаж, сайн засаглал, хариуцлагатай, уул уурхайг хэрэгжүүлэх. Өнөөдрийн байдлаар нэгдлийн хэмжээнд нийт 6.9 сая ширхэг мод тарьсан ба цаашид Ерөнхийлөгчийн гаргасан санаачилгыг дэмжиж 2030 он хүртэлх хугацаанд 291,5 сая мод тарих амлалт өгсөн. Тухайлбал, 2025 онд бид шинэ Хархорум хотын ногоон байгууламжийн төлөвлөлтийн хүрээнд 1,036 га талбайд 535 мянган мод тарихаар төлөвлөөд байгаа” гэв.
Дараа нь, нэгдлийн бүрэлдэхүүний “Эрдэнэт үйлдвэр” ТӨҮГ, “Эрдэнэс тавантолгой” ХК, “Эрдэнэс критикал минералс” ТӨҮГ, “Багануур” ХК, “Шивээ-Овоо” ХК, “Эрдэнэс алт ресурс” ХХК-ийн удирдлагууд “Тэрбум мод” үндэсний хөдөлгөөний дэмжиж өнгөрсөн хугацаанд хийж хэрэгжүүлсэн ажил болон цаашдын төлөвлөгөөгөө танилцууллаа. Тухайлбал, “Эрдэнэт үйлдвэр” ТӨҮГ “Эрдэнэт-100 сая”, “Эрдэнэс Тавантолгой” ХК “Сая тонн-сая мод” хөтөлбөрийг тус тус хэрэгжүүлж, 2030 он гэхэд нийт 280 сая мод тарихаар төлөвлөжээ. Харин “Эрдэнэс критикал минералс” ТӨҮГ нь 2030 оныг хүртэл нийт 2 сая мод тарьж, ургуулах амлалт өгсөн бол “Эрдэнэс алт ресурс” ХХК-ийн тухайд нийт 3 сая мод тарьж, ургуулахаар болжээ.
“Эрдэнэс Монгол” нэгдлийн “Тэрбум мод” үндэсний хөдөлгөөний хүрээнд хийгдсэн ажлуудтай танилцсаны дараа Ерөнхийлөгчийн Тамгын газрын дарга Г.Занданшатар мод тарих үйлсэд идэвх, санаачилгатай оролцож байгаад талархал илэрхийлээд төлөвлөгөөнийхөө дагуу улам эрчтэй ажиллахыг хүслээ.
Сэтгэгдэл (0)
Сэтгэгдэл бичигдээгүй байна