Ерөнхийлөгчийн ээлжит сонгуулийн бэлтгэл ажил аль хэдийн эхэлсэн гэдэгтэй зэрэгцээд Ерөнхийлөгч У.Хүрэлсүхийг дахин нэр дэвшихээр зэхэж, харин АН-аас Х.Баттулгыг дахин горилж буй гэх яриа улс төрийн хүрээнд гараад буй.
Тэгвэл өнгөрсөн долоо хоногт УИХ дахь АН-ын бүлэг мэдээлэл хийхдээ Ерөнхийлөгчийг дахин нэр дэвшүүлэхгүй байх санаачилга гаргаж буйгаа илэрхийлсэн байдаг. Тодруулбал, УИХ-ын гишүүн Х.Тэмүүжин "АН-ын бүлгийн 42 гишүүн Үндсэн хуулийн тогтвортой байдлыг хамгаалахын тулд Ерөнхийлөгч дахин сонгогдож болохгүй гэдэг дээр тууштай, хатуу зогсох ёстой гэх шийдлийг гаргахаар ярилцлаа" гэсэн юм.
Эл асуудлаар УИХ-д суудалтай ардчилсан намын 42 гишүүний 36 нь дэмжиж гарын үсэг зурсан бол үлдсэн зургаан гишүүний хувьд татгалзжээ. Эх сурвалжийн мэдээлж байгаагаар гарын үсэг зурахаас татгалзсан зургаан гишүүний дунд өмнө нь хэрэгт холбогдон шалгагдаж байсан хүмүүс ч байгаа аж.
Хамгийн сонирхолтой нь Ерөнхийлөгчийг дахин сонгогдох нөхцөлийг Үндсэн хуульд хийж болохгүй гэдэг санаачилгыг Ерөнхийлөгч асан, УИХ-ын гишүүн Х.Баттулга дэмжиж гарын үсэг зурсан байна.
Улс төрийн хүрээнд 2027 оны Ерөнхийлөгчийн ээлжит сонгуулийн гол өрсөлдөөний дүрүүдийг АН талаас Х.Баттулга, МАН талаас одоогийн Ерөнхийлөгч У.Хүрэлсүх байна гэх таамгийг дэвшүүлсэн байдаг.
Мөн эрх баригч МАН-ын тухайд Ерөнхийлөгчийн сонгуульд нэр двэшүүлэх кандидатаа тодруулахаар нэр бүхий 22 гишүүнийнхээ талаар судалгаа явуулсан байдаг.
2027 онд болох Ерөнхийлөгчийн ээлжит сонгуульд хуулийн дагуу УИХ-д суудалтай улс төрийн намууд л нэр дэвшүүлэх эрхтэй. Одоогоор эрх баригч МАН болон сөрөг хүчин АН-ын дотор Ерөнхийлөгчийн сонгуулийн "сунгаа" албан бусаар эхлээд байна.
Сэтгэгдэл (0)
Сэтгэгдэл бичигдээгүй байна