Путинд уурласан Трамп ОХУ-ын газрын тосонд хориг тавина хэмээв

АНУ-ын Ерөнхийлөгч Доналд Трамп ням гарагт /2025.03.30/ ОХУ-ын Ерөнхийлөгч Владимир Путинд уурлаж буйгаа илэрхийлж, хэрэв Москва Украины дайныг зогсоох оролдлогод нь саад хийвэл ОХУ-ын газрын тос худалдан авагчдад 25-50 хувийн хоёрдогч татвар оногдуулна гэжээ. 

Трамп “NBC News” агентлагт утсаар ярилцлага өгөхдөө Путин Зеленскийн удирдах эрхийг шүүмжилсэнд маш их уурлаж байна хэмээсэн аж. Нэгдүгээр сард албан тушаалаа авснаас хойш Трамп ОХУ-д илүү ээлтэй хандаж эхэлсэн нь Европын холбоотнуудын санааг зовоогоод байсан юм. Тэгвэл Трампын ням гарагт хэлсэн зүйл нь гал зогсоох хэлэлцээнд ямар нэгэн ахиц гарахгүй байгаад тэр бухимдаж эхэлж буйг харууллаа.

“NBC News” агентлаг мэдээлснээр бол Трамп “Хэрэв ОХУ бид хоёр Украинд цус урсгаж буй явдлыг зогсоох тохиролцоонд хүрч чадахгүй бол, бас үүний буруутан нь ОХУ гэж би үзвэл Оросоос гарч буй бүх газрын тосонд хоёрдогч татвар ногдуулна. Хэрвээ та ОХУ-аас газрын тос худалдаж авдаг бол АНУ-д бизнес эрхлэх боломжгүй болгоно. Мөн 25-50 хувийн татвар бүх газрын тосонд тавина” гэжээ. 

Эх сурвалж: Reuters