Шинэ нам Ардчилсан намд нэгдэх шийдвэрээ баталжээ

ШИНЭ намын ээлжит бус IV дүгээр Их хурал өчигдөр болж 1089 төлөөлөгчдийн 99.3%-ийн саналаар Ардчилсан Намд нэгдэх шийдвэрийг баталжээ.

Тус хуралдаанд Ардчилсан Намын Ерөнхий Нарийн бичгийн дарга Н.Ганибал оролцож, Монгол Улсад ардчиллаа буцаан сэргээх үйлсэд ШИНЭ намтай хамтран ажиллах АН-ын Улс төрийн зөвлөлийн шийдвэрийг албан ёсоор танилцуулсан байна.

Тэрээр “Үйл хэрэгтээ үнэнч байж тууштай зогсож ирсэн, ШИНЭ намын нийт гишүүд, дэмжигчид та бүхэнд, Ардчилсан Намын нэрийн өмнөөс гүн талархал илэрхийлье. Та бүхний тэмцэл, үнэт зүйлс, үзэл санаа зөвхөн ШИНЭ намын бус, Монголын ардчиллын төлөөх үнэт зүйл, үзэл санаа болох зайлшгүй шаардлагатай байна. Ардчилсан Нам бол ардчилсан хувьсгалын гал голомт. ШИНЭ нам бол шударга ёсны тэмцлийн гал голомт билээ. Энэ хоёр хүчний нэгдэл бол нэг удаагийн улс төрийн үйл явдал бус, Монголын ардчиллын хувь заяаг шийдэх хариуцлагатай шийдвэр юм” гэжээ.

ШИНЭ намын дарга Ц.Гантулга “Бидний үнэт зүйл, зорилго Ардчилсан Намын үзэл баримтлалтай нийцэж байгаа тул нэгдэх шийдвэрийг гаргалаа. Энэхүү нэгдэл нь илүү хүчирхэг, хариуцлагатай улс төрийн хүчин бий болоход чухал түлхэц болно” хэмээн онцолжээ.

Мөн ШИНЭ намын үүсгэн байгуулагч, намын дарга асан, УИХ-ын гишүүн асан Ж.Батзандан болон ШИНЭ намын үүсгэн байгуулагч, УИХ-ын гишүүн асан, Монгол Улсаас Бельгийн Хаант Улсад суугаа Элчин сайд Л.Болд нар мэндчилгээ дэвшүүлсэн байна.