Украины арми Оросын Курск муж орчимд хэсэг газрыг хяналтдаа авснаас хойш анх удаа ОХУ-ын Ерөнхийлөгч В.Путин тус мужид очжээ. Тэрээр Курск мужид очиж нөхцөл байдалтай танилцаж, Оросын жанжин штабын дарга Валерий Герасимов болон "Умард" бүлэглэлийн удирдлагуудтай уулзаж ярилцсан байна.
Валерий Герасимов илтгэл тавьж, Курск мужийн 86% нь буюу 1.1 мянган кв/км газар нутгийг чөлөөлсөн, сүүлийн тав хоногт гэхэд 24 сууринг чөлөөлснийг дурьдав. Украины тал нийт 68 мянган хүн 7 мянган техникээ алдсан, украины армийн бүлэглэлийг бүрэн тусгаарласан, одоо үе шаттайгаар устгаж байна гэжээ.
В.Путин илтгэлийг сонссоны дараа ойрын хугацаанд Курск мужид бүгсэн дайсныг нэгмөсөн бут цохиж дуусгах, улсынхаа хилийн дагуух шугамыг буцааж сэргээх үүрэг өгчээ. В.Путин цэргийнхэнд хандаж Оросын нутагт халдан довтолсон этгээдүүдийг алан хядагчид гэж үзэж хандах ёстойг цэргийнхэнд сануулсан байна. Тодруулбал тэрээр хэлэхдээ, "Энд Курск мужид байж, энгийн иргэдийн эсрэг гэмт хэрэг үйлдэж байгаа этгээдүүд /өөрөөр хэлбэл украины зэвсэгт хүчин/ ОХУ-ын хуулийн дагуу бүгд алан хядагчид болно. Гэхдээ, бидний гарт орсон хүмүүст бид хүмүүнлэг хандаж байгаа, хандах ч ёстой. Түүнээс гадна, 1949 оны Цэргийн олзлогдогч нартай харьцах тухай Женевийн конвенци гадаадын хөлсний цэргүүдэд үйлчилдэггүйг дахин сануулмаар байна" гэжээ.
Сэтгэгдэл (0)
Сэтгэгдэл бичигдээгүй байна