МУИС чансаагаараа дэлхийд 1501-рт эрэмбэлэгдлээ

"Times Higher Education" олон улсын байгууллага дэлхийн их сургуулиудын 2025 оны эрэмбийг зарлахад Монгол Улсын их сургууль анх удаа албан ёсоор эрэмбэлэгдэж чансаагаараа 1501 дүгээр байрт жагсжээ.

Сайд Л.Энх-Амгалан "Монголын бүх их, дээд сургуульд гүйцэтгэлийн үзүүлэлтэд суурилсан чанарын үнэлгээг тогтмол хийж, эрэмбэ, чансааг тогтоож хэрэглэгч олон нийтэд мэдээлж байх ёстой. 2023 онд УИХ-аар батлуулсан Боловсролын багц хуульд дээр дурдсан хуулийн зохицуулалтыг оруулж өгсөн.

Мөн Боловсрол, шинжлэх ухааны сайдаар ажиллаж байх үедээ Дэлхийн боловсролын сайд нарын чуулга уулзалтад оролцон, "Times Higher Education" байгууллагын удирдлагуудтай уулзаж байв. Энэ үеэр Монголын их, дээд сургуулиудыг олон улсын аргачлалаар эрэмбэлүүлэх хүсэлт тавьж байсан маань ийнхүү биеллээ олсонд туйлын баяртай байна" гэв.

Дашрамд, дэлхий дээр 30 мянга гаруй их сургууль байдаг. Тэдгээрийн 2000 орчим нь л "Times Higher Education"-ийн эрэмбэлэгдэх шаардлагыг хангадаг байна. Монгол Улсын тухайд "Times Higher Education" байгууллагатай хамтран дотоодын 65 их, дээд сургуулийн урьдчилсан эрэмбэ хийж олон нийтэд нээлттэй зарласан байдаг.