Монгол Улсын эрчим хүчний шинэ эх үүсвэр Бөөрөлжүүт цахилгааны станцыг өнөөдөр нээлээ.
600 МВт-ын хүчин чадал бүхий нүүрсэн тэжээлт энэ цахилгаан станцын төслийг “Бодь” группийн охин компани болох “Цэцэнс майнинг энд энержи” ХХК үе шаттай хэрэгжүүлэн барьж, ашиглалтад орууллаа.
Тус компани 2011-2016 онд Бөөрөлжүүт нүүрсний ордны геологийн хайгуул, уурхай болон цахилгаан станцын ТЭЗҮ, байгаль орчинд нөлөөлөх нөлөөллийн үнэлгээ зэрэг бүхий л судалгаа үндэсний болон олон улсын байгууллагуудтай хамтарч, олон улсын стандартын дагуу хийж гүйцэтгэжээ. 2017 оноос уурхайн олборлолтыг эхлүүлсэн ба өдгөө Улаанбаатар хотын эрчим хүчний үйлдвэрлэлд хувь нэмэр оруулж байна.
Төв аймгийн Баян сумын нутагт нийслэлээс 130 км алслагдсан цахилгаан станцад 540, нүүрсний уурхайд 500 нийт 1000 гаруй шинэ ажлын байр бий болгожээ. Ингэснээр шинэ цахилгаан станц, уурхайг дагасан суурьшлын бүс бий болж, улс орны нийгэм, эдийн засагт эерэг нөлөөлөл авчрах эрчим хүчний нэгэн шинэ эх үүсвэр ажиллаж эхэллээ.
Шинэ станцын нээлтэд Ерөнхий сайд Л.Оюун-Эрдэнэ, Эрчим хүчний сайд Б.Чойжилсүрэн нар болон Засгийн газар, УИХ-ын гишүүд, бүтээн байгуулагчид оролцов.
Сэтгэгдэл (0)
Сэтгэгдэл бичигдээгүй байна