Хиймэл оюун ухааны технологийн тэргүүлэгч компани болох OpenAI Ази тив дэх анхны салбараа Япон улсын нийслэл Токио хотод нээлээ.
Япон нь технологиор тэргүүлэгч улсуудын нэг бөгөөд инновацыг дэмжигч орон учир Ази тивийн анхны салбараа Японд нээж байгаа гэв.
OpenAI нь хиймэл оюун ухаант чатбот ChatGPT-г хөгжүүлсэн бөгөөд Токиод салбараа нээж буйтай холбоотойгоор тус бүтээгдэхүүний япон хэл дээрх хувилбарыг танилцуулсан байна.
Ингэснээр Японд технологиор тэргүүлдэг компаниуд болох Daikin, Rakuten зэрэг компаниудтай илүү ойр ажиллаж, мэдээллийн дүн шинжилгээ хийх, тайлан гаргах зэрэг ажлуудад нь туслах боломжтой гэв.
АНУ-ын Сан Францискод төвтэй тус компани Лондон, Дублин хотод салбаруудаа нээгээд байсан юм.
OpenAI-ын гүйцэтгэх захирал Сэм Олтмэн "Хүмүүсийг илүү бүтээлч, үр бүтээмжтэй байлгахад хиймэл оюун ухаан туслах бөгөөд одоогийн болон цаашдын шинэ салбаруудад үнэ цэнийг бий болгоно" гэжээ.
80 тэрбум ам.доллароор үнэлэгдэх тус компанийн захирал Сэм Олтмэн тэрбумтнуудын эгнээнд нэгдсэнийг Форбесоос зарласан. Гэхдээ компанийнхаа нэг ч хувьцааг эзэмшдэггүй нь олны анхаарлыг татдаг. Тэрбээр ихэнх хөрөнгөө Reddit, Stripe зэрэг гарааны бизнест хөрөнгө оруулж босгосон байна.
